Pyrenaica 300 (2025)

Edozeinen bizitza edota proiektua bizitza etapa ezberdinetan banatzen da, eta etapen arteko lokarriari eboluzioa deitzen diogu. Horretan datza gure bizitzak, bizipenak izan, haietatik ikasi, eta prest gaudenean adorea batu eta hurrengo etapara salto egin; eboluzionatu. 

Hala egin ohi dugu mendizaleok txikitan, familiaren eskutik lehenengo etapa batean, etxetik gertu ditugun mendietara irteerak eginez. Ondoren, mendi talde batean izena eman eta eskarmentudun pertsonekin irteera zailagoak egiten hasi ohi gara. Geroxeago, ikasitakoarekin, Pirinioak eta zailtasun handiagoko mendiak bisitatuz ziurrenik; eta azkenik, nagusiak garenean, gure gorputzak eskatzen digun erritmora moldatzen ditugu gure irteerak. Etapa batek edo besteak ez dauka zertan hobea izan, bakoitzak bere gauza onak eta txarrak izan ditzake; baina bada guztiek komunean duten zerbait: guztietatik ikasten dela zeozer, hain zuzen.

Era berean, denboran zehar ikasitakoarekin aurrera eginez, bai Euskal Mendizale Federazioak zein Pyrenaicak hainbat etapa bizi izan dituzte. Iaz, EMF izan bazen mendeurrena bete zuena, 2026. urtean Pyrenaicak hartuko du bere lekukoa. Honaino iristeko, hainbat kolaboratzaile, erredakzio talde eta zuzendarik egindako lana guztiz beharrezkoa izan da. Mendizaleen antzera, aldizkariak ere bere historian pausoak emanez eta haziz joan da; gaur egun esku artean dugun dokumentua bilakatu arte; euskal mendizaleon historioa biltzen duen altxor bilakatu arte. Formatuaren ikuspegitik aztertuz, esan genezake Pyrenaicak 5 edo 6 garai bizi izan dituela, baina aldi berean, aldizkariak izan dituen zuzendari bezainbeste etapetan bana daiteke. Aipatu dugun moduan, ez da ez etapa hoberik ez okerragorik izan haien artean, guztiak baitira gaur egun aldizkaria bizirik mantentzearen arduradunak. Guztien batura da gaur egungo egoera onaren erantzulea eta oinarria.

Beste behin, etapa baten amaierara iristen ari gara; bada garaia beharko dugun kemena bildu eta mendeurrenari begira hurrengo etapara salto egiteko, eboluzionatzeko. Ideia berriek beti dakartzate aukera berriak. Esango nuke, amaitzen ari garen etapa honetan, Pyrenaica publikoa eta zabalagoa izatea lortu dugula, aniztasuna oinarri. Halakoa baita gure federazioa, anitza, gustu eta afizio ezberdin asko biltzen dituena eta elkartasunaren erakusleiho handi bat. 

Pyrenaicaren etorkizuna euskal mendizaleon elkartasun horren eskutik helduta joango da beti. Guztiok federazioaren ikur edo baloreak elikatzen jarraitzen ditugun bitartean, makineria honek ez du erregairik faltan izango etapaz-etapa aurrera egiteko.